🌷 വിധുമുഖി 🌹 [കൊമ്പൻ]

“അമ്മെ! തമ്മിൽ നിങ്ങളിത്രയ്ക്ക് ഇഷ്ടമായിട്ടും എന്തിനാ വിവാഹം കഴിക്കാഞ്ഞേ…?!!!”

“എന്താ?!” അപ്പനും അമ്മയും കൂടെയാണ്, ഒരു ഞെട്ടലോടെ എന്നോട് ചോദിച്ചത്..അവരുടെ മുഖത്തെ ചിരി കാണുമ്പോ എനിക്കിപ്പോഴും അത്ഭുതമാണ്.

ജീവനുതുല്യം ഒരാളെ പ്രണയിക്കുക…എന്നിട്ട് ഇഷ്ടമില്ലാഞ്ഞിട്ടും വീട്ടുകാരുടെ നിർബന്ധത്തിനു വഴങ്ങി മറ്റൊരാളെ വിവാഹം കഴിക്കേണ്ടി വരിക, എന്നിട്ടുപോലും അപ്പൻ ചതിച്ചെന്നു തോന്നൽ ഇല്ലാതെ വസുധമ്മ, അപ്പന് വേണ്ടി ആയിരം രാത്രികൾ കാത്തിരുന്നതിനു ഫലമായിരിക്കും…. അമ്മ ദേ ഇപ്പോ അപ്പന്റെ കൂടെ തോളിൽ ചേർന്ന് കൈകോർത്തു കൊണ്ടിരിക്കുന്നത്. ശെരിക്കും പ്രണയം ഇത്രേം ശക്തിയുള്ള ഒരു സംഭവമാണെന്ന് ഒരാളോട് പറയാൻ അപ്പന്റെയും അമ്മയുടെയും ഈ കഥ മാത്രം മതി! ശെരിയല്ലേ?!

ഞാൻ അമ്മയുടെ മുഖത്തേക്ക് നോക്കിയിരുന്നു. എന്താണ് അമ്മയതിനു മറുപടി പറയാൻ പോകുന്നതെന്നറിയാനുള്ള ആകാംഷയെന്നെ ഭരിച്ചുകൊണ്ടിരുന്നു.

“പ്രണയം…. ഇഷ്ടം ഇതൊക്കെ മനസിലെ ഓരോ തോന്നൽ അല്ലെ കുട്ടാ! അതുകൊണ്ട് തോന്നൽ സത്യമെന്നു വിശ്വസിക്കാം പക്ഷെ സ്വന്തമാക്കാൻ നമ്മളൊരിക്കലും മോഹിക്കരുത്, മനസ് തുറന്നു സ്നേഹിച്ചു വീർപ്പുമുട്ടിക്കുക….അത് മാത്രമാണ് ഞാൻ ചെയ്തിട്ടുള്ളത്….പക്ഷെ എന്റെ ജീവിതം ശെരിക്കും തുടങ്ങിയത് ഈ സാധനം പെട്ടന്നൊരൂസം എന്നെ വിളിച്ച അന്നാണ്. എന്നിട്ട് ഒറ്റയ്ക്ക് താമസിച്ചു തനിക്ക് മതിയായോ എന്നൊരു ചോദ്യവും, ഞാൻ പിന്നെയെന്തു നോക്കാൻ, കെട്ടും ഭാണ്ടവുമൊക്കെ ഒക്കെയെടുതിങ്ങു പോന്നു, നീയന്നെ നിന്റെയമ്മയായി അക്സപ്റ്റ്റ് ചെയ്യുമോ എന്ന പേടിയുണ്ടായിരുന്നു, പക്ഷെ മാത്തു, അപ്പോഴും കയ്യിലെ വറ്റാത്ത സ്നേഹമുള്ള നിനക്കെന്തിന് പേടി എന്നാണ് നിന്റെ അപ്പൻ എന്റെ നനയുന്ന കണ്ണ് തുടച്ചുകൊണ്ട് ചോദിച്ചത്!!!!”

അപ്പൻ പോലീസ് ആണെന്ന് പറഞ്ഞിട്ട് യാതൊരു കാര്യവുമില്ല, അമ്മയുടെ കണ്ണിലേക്കു മതിമറന്നു നോക്കുകയാണ് കക്ഷി. പ്രണയത്തെക്കുറിച്ചു ഇത്രേം അറിവുള്ള ഇവരുള്ളപ്പോ എന്റെ മനസ് കവർന്ന അവളെ കണ്ടെത്താൻ അമ്മയോട് സഹായം ചോദിക്കാം എന്ന് ഞാനും ഉറപ്പിച്ചു.

അമ്മ എണീറ്റുകൊണ്ട് അത്താഴം വിളമ്പി, എല്ലാരും ചേർന്ന് കഴിച്ച ശേഷം ഞാൻ അമ്മയുടെ മടിയിൽ കുറച്ചു നേരം കൂടെ ഇരുന്ന് എന്റെ മനസിലുള്ളത് പറയാൻ തുടങ്ങുമ്പോ, കൃത്യ സമയത്തു അപ്പൻ എനിക്ക് ജർമനിയിലെ അപ്പന്റെ സുഹൃത്തിന്റെ ഫോൺ തന്നു. ഫ്രണ്ടെന്നും പറയാം സ്റ്റീഫച്ചയാനെന്നും പറയാം. അപ്പൻ ഇത്ര നേരം സ്റ്റീഫച്ചായനോട് കത്തിയടിയായിരുന്നു. ഞാനും വിശേഷമൊക്കെ പറഞ്ഞു വേഗമങ്ങെത്താമെന്നു ഉറപ്പും കൊടുത്തു വെച്ചു.