🎪കൊച്ചിൻ കാർണിവൽ 6 [Harry Potter]

“അല്ല.. താൻ എന്താ ഇവിടെ….?” ചന്ദ്രികയെ പ്രതീക്ഷിക്കാതെ ഇവിടെ കണ്ടത് കൊണ്ട് ഞാൻ ചോദിച്ചു..

“ബെസ്റ്റ്.. ഇത് ഞാൻ തന്നോട് ചോദിക്കേണ്ട ചോദ്യമല്ലേ…. ഞാനിവിടെ ഫങ്ക്ഷന് വന്നതാ. അഭി എങ്ങനാ ഇവിടെ വന്നത്.?”ചന്ദ്രിക തിരികെ ചോദിച്ചു.

“ഞാൻ ബാംഗ്ലൂരിൽ ഒരു മീറ്റിംഗിന് വന്നതാ.. അപ്പോൾ മല്ലിക മാഡം ഇങ്ങനൊരു ഫങ്ക്ഷൻ നടക്കുന്ന കാര്യം പറഞ്ഞു. പാസ്സ് കിട്ടി, അങ്ങനെ വന്നതാ.

“ഓ.. ഓക്കേ ഓക്കേ. അല്ല മല്ലിക വന്നിട്ടുണ്ടോ..?

“വന്നിരുന്നു.. ദാ ഇപ്പോൾ പുറത്തേക്ക് പോയി…”ഞാൻ പറഞ്ഞു..

“ശോ.. കാണാൻ പറ്റിയില്ല…അല്ല അഭി പോവുകയാണോ…?

“പോകാൻ ഇറങ്ങിയതാ…

“അത്യാവശ്യം ഉണ്ടോ പോയിട്ട്…?

“ഏയ്…

“എന്നാൽ എന്റെകൂടെ വാ…”ചന്ദ്രിക പറഞ്ഞു.

ഞാൻ എതിർക്കാനൊന്നും നിന്നില്ല, ചന്ദ്രികയുടെ കൂടെ മുകളിലെ ഹാളിലേക്ക് ഞാനും ചെന്നു.

ഉള്ളിൽ കയറിയപാടെ ചന്ദ്രികയുടെ അടുത്തേക്ക് കുറച്ചധികം മോഡൽസ് സംസാരിക്കുവാനായി വന്നു. അവരെ കണ്ടതും ഞാൻ നടത്തം നിർത്തി അല്പം മാറി നിൽക്കാൻ നോക്കി. എന്നാൽ ഒട്ടും പ്രതീക്ഷിക്കാതെ എന്റെ കൈയിൽ പിടിച്ചുകൊണ്ടു ചന്ദ്രിക എന്നെ തടഞ്ഞു.”എങ്ങോട്ടാ ഓടുന്നത്…കൂടെ നിൽക്കു” പതിഞ്ഞ ശബ്ദത്തിൽ ചന്ദ്രിക പറഞ്ഞു.മാറി നിൽക്കാനുള്ള ശ്രമം ഉപേക്ഷിച്ചു ഞാൻ ചന്ദ്രികയോടൊപ്പം നിന്നു. അവളെ കണ്ട  മോഡൽസ് പരസ്പരം കെട്ടിപ്പിടിക്കുകയും, സുഖവിവരം തിരക്കുകയും ചെയ്തു. അവരുടെ സംസാരത്തിനിടയിൽ ഒരു മോഡൽ ഞാനാരാണെന്ന് ചന്ദ്രികയോട് ചോദിച്ചു.

“ഹി ഈസ്‌ മൈ ഫ്രണ്ട്‌”എന്റെ കയ്യിൽ മുറുകെ പിടിച്ചുകൊണ്ടു ചന്ദ്രിക പറഞ്ഞു.

അവൾ അങ്ങനെ പറഞ്ഞപ്പോൾ എന്തെന്നില്ലാത്ത  സന്തോഷം എനിക്കുണ്ടായി. അത്രയും വലിയ മോഡൽസിനു മുൻപിൽ,  വലിയ മാർക്കറ്റ് വാല്യൂ ഉള്ള ചന്ദ്രികയെ പോലൊരു മോഡൽ എന്നെ ഫ്രണ്ട്‌ ആയി പരിചയപ്പെടുത്തിയപ്പോൾ എങ്ങനെ സന്തോഷിക്കാതിരിക്കും.

അവരുടെ സംസാരത്തിനിടയിൽ കുറച്ചുനേരം ഞാനും എല്ലാം കേട്ടുകൊണ്ട് നിന്നു. എനിക്ക് മടുപ്പായി എന്ന് മനസ്സിലായിട്ടാവാം, പോയി ഇരുന്നോളാൻ ചന്ദ്രിക പറഞ്ഞു. അടുത്തു കിടന്ന ടേബിളിൽ പോയി ഞാനിരുന്നു. കുറേ നേരത്തെ സംസാരത്തിന് ശേഷം രണ്ട് ഗ്ലാസ്സ് മദ്യവും വാങ്ങി ചന്ദ്രിക എന്റരികിൽ വന്നിരുന്നു.