Posted by റോഷൻ : “നാളെ ഞാനും ശ്രീലക്ഷ്മിയും ബാംഗ്ലൂർക്ക് കേറും… അത് വരെ നിക്കാൻ ഒരിടം ഞാൻ കണ്ടു വച്ചിട്ടുണ്ട്…”
റോഷന്റെ പറച്ചില് കേട്ട് ഇരുവരും ഒരു നിമിഷം പരസ്പരം നോക്കി. ശേഷം അവനോടായി, ഒരേ സ്വരത്തിൽ ചോദിച്ചു, “എവിടെ….?”
*** *** *** *** ***
“കൂത്താട്ടുകുളം”, ശ്രീലക്ഷ്മിക്ക് മുൻപിൽ, തന്റെ വിവാഹ ആൽബത്തിന്റെ പേജ് മറിച്ചുകൊണ്ടു അഞ്ജു തുടർന്നു, “അവിടെ വച്ചായിരുന്നു വിവാഹം… ഇടദിവസമായിരുന്നത് കൊണ്ട് ആളുകളും കുറവായിരുന്നു…”
ശ്രീലക്ഷ്മി പുഞ്ചിരിച്ചുകൊണ്ട്, ആൽബത്തിലേക്ക് വീണ്ടും കണ്ണുകൾ തിരിച്ചു… ഈ സമയം, അഞ്ജുവിന്റെ മുറി വാതിക്കലിലേക്ക് റോഷൻ കടന്നു വന്നത് കണ്ട് ഇരുവരും ആൽബം അടച്ചു വച്ചു… പുറം പേജിലുള്ള അഞ്ജു-വിമൽ ജോടികളുടെ വിവാഹ ഫോട്ടോ റോഷന്റെ കണ്ണിലുടക്കും വിധം തെളിഞ്ഞ് കണ്ടു.
“ശ്രീലക്ഷ്മി… നമുക്ക് ഉടനേ ഇവിടെ നിന്നും ഇറങ്ങണം…”, അവൻ ഗൗരവ്വത്തിൽ പറഞ്ഞു.
ശ്രീലക്ഷ്മി തലയാട്ടി. അവൾ അഞ്ജുവിനെ ഒന്ന് നോക്കിയ ശേഷം, തൊട്ടടുത്ത മുറിയിലേക്ക്, സാധനങ്ങൾ എടുക്കാനായി നീങ്ങി.
തന്റെ അരികിലൂടെ ശ്രീലക്ഷ്മി കടന്നു പോയതും, അവൻ അഞ്ജുവിനെ നോക്കി. നഗ്നനേത്രങ്ങൾക്ക് അദൃശ്യമായ ഒരു മതിൽ ഇരുവർക്കുമിടയിൽ അവൻ കണ്ടു. അവൻ തിരിഞ്ഞ്, പുറത്തേക്ക് നടക്കാൻ ഒരുങ്ങി.
“റോഷാ…”, പെട്ടന്ന് അഞ്ജുവിന്റെ വിളി അവന്റെ കാതിലേക്ക് വന്നെത്തി.
അവൻ നിർഭാവത്തോടെ, അവൾക്ക് നേരെയായി തിരിഞ്ഞു നിന്നു.
അഞ്ജു: “എനിക്ക് ഒരു കാര്യം സംസാരിക്കാനുണ്ട്… അകത്തേക്ക് വരാമോ…?”
കേട്ടതും, റോഷൻ ഒരു നിമിഷം ഉമ്മറത്തേക്ക് കണ്ണെത്തിച്ചു നോക്കി… ഇല്ല, എല്ലാവരും മറ്റെന്തോ സംസാരത്തിലാണ്’, അലവലാതി മൊഴിഞ്ഞു. അവൻ മടിച്ചു മടിച്ചു അവളുടെ മുറിക്കകത്തേക്ക് കയറി.
സങ്കർഷം തിങ്ങുന്ന മനസ്സുമായി, തന്റെ മുന്നിൽ നിൽക്കുന്ന അവനെ അവളൊന്ന് സഹതാപപൂർവ്വം നോക്കി… ശേഷം…
“ആര് പറയണതും കേക്കാൻ നിക്കണ്ടട്ടൊ… റോഷൻ ചെയ്യുന്നതാ കറക്ട്… ആ കുട്ടിയുടെ അവസ്ഥ അത്രക്ക്…..”, അഞ്ജു വാചകം പൂർത്തീക്കരിക്കാതെ നിർത്തി…
“മ്മ്…”, അവൻ മൂളി. അവളിൽ നിന്നുമുള്ള ആ വാക്കുകൾ അവനെന്തോ സമാധാനം പകർന്ന് നൽകി.
അഞ്ജു: “നാളെ പോവാണല്ലേ…?”
റോഷൻ: “ആഹ്…”