🏘️ബോസ്റ്റൻ ബംഗ്ലാവ് 4 [Gladiator]

🔸🔸🔸🔸

ഡാനിയേൽ കിഴക്ക് വശത്തുള്ള ടവർ റൂമിലേക്കുള്ള ഗോവണിപ്പടികൾ കയറി ഡെയ്സിയുടെ റൂമിലേക്ക് നടന്നു.ചാരിയിരുന്ന വാതിൽ തുറന്ന് ഡാനിയേൽ അകത്തേക്ക് കേറി.

“ഡെയ്സി…നീയിവിടെ ഇല്ലേ..?”ഡാനിയേൽ ചോദിച്ചു.

അവനാ റൂം മുഴുവൻ കണ്ണോടിച്ചു. പക്ഷെ ഡെയ്സിയെ അവിടെയെങ്ങും അവൻ കണ്ടില്ല.

ബഗ്ലാവിന്റ ഉയർന്ന ടവറിൽ സ്ഥിതി ചെയുന്നത് കൊണ്ടാണ് ഈ മുറിയെ ടവർ റൂം എന്ന് വിളിക്കുന്നത്. ബംഗ്ലാവിന്റെ ഏറ്റവും ഉയർന്ന വശം.അവൻ റൂമിൽ നോക്കിയെങ്കിലും പെങ്ങളെ കണ്ടില്ല.

“ഡെയ്സി……. “അവൻ വീണ്ടും വിളിച്ചു.

റൂമിലെ ഒരുവിധം എല്ലാ ജനാലകളും തുറന്ന് കിടന്നിരുന്നു., അതിലൂടെ ഇളം കാറ്റ് റൂമിലേക്ക് അടിച്ചുകേറി.

“ഞാനിവിടെ ഉണ്ട്…”ജനാലയ്ക്ക് പുറത്തുകൂടി ഡെയ്സിയുടെ ശബ്ദം കേട്ടു.

ഡാനിയേൽ ശബ്ദം കേട്ട ഭാഗത്തെ ജനാലയിലൂടെ പുറത്തേക്ക് നോക്കി.

ടവറിൽ നിന്ന് ഏകദേശം നാലടി പുറത്തേക്ക് നീണ്ടു നിൽക്കുന്ന ഫിഷ് സ്കെയിൽ ഷിംഗിൾ റൂഫിൽ തന്റെ ഇരട്ട സഹോദരി കാലുകൾ കയറ്റി ചമ്പ്രം പടിഞ്ഞു ഇരിക്കുന്നത് അവൻ കണ്ടു.. അവളുടെ തവിട്ടുനിറത്തിലുള്ള മുടി കാറ്റിൽ പറന്നു. നോക്കെത്താ ദൂരത്തോളം നീണ്ടു കിടക്കുന്ന മലകളുടെയും മരങ്ങളുടെയും ഭംഗി ആസ്വദിച്ചു അവളിരിക്കുകയാണ്.

ബംഗ്ലാവിൽ എത്തിയ ശേഷം ജൂലിയുടെയും, ഡാനിയേലിന്റെയും സ്വഭാവം മാറിയത് പോലെ ഡെയ്സിയുടെ സ്വഭാവവും മാറിയിരുന്നു. മൊബൈൽ, ഫ്രണ്ട്‌സ് എന്ന് പറഞ്ഞു നടന്നവൾക്ക് ഇപ്പോൾ അധികവും ഏകയായി ഇരിക്കുന്നതിനും, പ്രകൃതി ഭംഗി ആസ്വദിക്കുന്നതുമാണ് പ്രിയം.