🔥ഏദൻ തോട്ടത്തിന്റെ കാവൽക്കാരൻ 13🔥[സഞ്ജു സേന]

അധികം സമയമെടുക്കരുത്,കൂടി വന്നാൽ പത്തോ പതിനഞ്ചോ മിനിറ്റ് . ”

ആംബുലൻസ് നിർത്തി ഡ്രൈവർ എനിക്ക് നേരെയൊരു കടലാസ്സു പൊതി നീട്ടി ,അപ്പോഴേക്കും നഴ്സിംഗ് കോട്ടൊക്കെ ധരിച്ച രണ്ടു പെൺകുട്ടികളും ,ഒരു പയ്യനും ആംബുലൻസിനു അടുത്തേക്ക് വരുന്നത് കണ്ടു അയാളുടെ കയ്യിൽ നിന്ന് പൊതി വാങ്ങി ഞാൻ ഡോർ തുറന്നു പുറത്തേക്കിറങ്ങി . പിന്നാലെ പ്രിയയും സമീറയും , എന്താണെന്നറിയില്ല അവരെ രണ്ടു പേരെയും കണ്ടു എന്തോ അടക്കം പറഞ്ഞു ചിരിച്ചു കാത്തു നിന്ന പെൺകുട്ടികൾ പിന്നിലേക്ക് കയറിയിരുന്നു .അവർ ഡോർ വലിച്ചു ലോക്ക് ചെയ്തതോടെ ആംബുലൻസിന്റെ റിവേഴ്‌സ് ലൈറ്റ് തെളിഞ്ഞു ..

”അർജുൻ ? ”’

പെണ്കുട്ടികൾക്കൊപ്പം നിന്നിരുന്ന പയ്യൻ എന്റെ അടുത്തേക്ക് വന്നു ..

”യെസ് , ”

”സരോജ മാഡം .”

അവൻ കയ്യിലിരുന്ന ഫോൺ എനിക്ക് നേരെ നീട്ടി ..

”അർജുൻ ,ഞാൻ സരോജമാണ്‌ , ”

”പറയൂ ഡോക്ടർ , ഞങ്ങൾ താഴെയുണ്ട് ,”

”നിങ്ങളെ കാത്തു നിന്നതു എന്റെ സ്റ്റുഡന്റ്‌ ആണ് ,ഷിജിൽ ,അവൻ നിങ്ങളെ ഐ .സി. യുവിലെത്താനുള്ള എമർജൻസി ഡോർ നു മുന്നിൽ വരെ എത്തിക്കും.. ”

”മാഡം അത് ?..”

”പേടിക്കേണ്ട അർജുൻ ,ഞാനിവിടെയുണ്ട് ..”

എന്റെയുള്ളിലെ ആശങ്ക തിരിച്ചറിഞ്ഞാകും അവർ ധൈര്യം പകർന്നു ..

” ഡ്രൈവർ നിങ്ങൾക്ക് ധരിക്കാനുള്ള ഓവർകോട്ടുകൾ തന്നിട്ടില്ലേ .”

ഫോൺ തിരിച്ചു കൊടുക്കുമ്പോൾ ആ പയ്യൻ ചോദിച്ചു ..

”ഉവ്വ് …”

”ധരിക്കാൻ മറക്കേണ്ട ..”

ഷിജിൽ പറഞ്ഞത് കേട്ട് നേരത്തെ ഡ്രൈവർ നൽകിയ പൊതി അഴിച്ചു നോക്കി , നഴ്സിംഗ് വിദ്യാർത്ഥികൾ ഉപയോഗിക്കുന്ന വെള്ള ഓവർ കോട്ടുകളാണ് ,പക്ഷെ രണ്ടെണ്ണമേയുള്ളു ..”

”സാരമില്ല, എല്ലാവരും ഒരുമിച്ചു തന്നെ നിന്നാൽ മതി ..”

പയ്യൻ പറഞ്ഞത് കേട്ടു ഞാൻ പ്രിയയെയും ,സമീറയെയും നോക്കി ..

”അവൾക്ക് കൊടുത്തേക്ക് ..”

പ്രിയയുടെ സമ്മതം കിട്ടിയതോടെ ഞാൻ ബാക്കിയുള്ള കോട്ട് സമീറയ്ക്ക് നൽകി ,ഷിജിലിന്റെ പിന്നാലെ സ്റ്റോർ റൂം കടന്നു ചെന്നത് ഹോസ്പിറ്റൽ സ്റ്റാഫിന് മാത്രം ഉപയോഗിക്കാനുള്ള ലിഫ്റ്റ്നു അടുത്തേക്കായിരുന്നു.. മുകളിലെ ഫർമസികളിലേക്കുള്ള മരുന്ന് പെട്ടികളുമായി രണ്ട് അറ്റെൻഡർമാർ കൂടിയുണ്ട് ലിഫ്റ്റിൽ കയറാൻ..അവരെന്തോ സാലറി വിഷയം സംസാരിക്കുന്ന തിരക്കിലാണ് ,ഇടയ്ക്ക് ഞങ്ങളെ നോക്കി പരിചയഭാവത്തിൽ ഒന്ന് ചിരിച്ചു ,പിന്നെ വീണ്ടും അവരുടെ വിഷയത്തിലേക്ക് തിരിച്ചു പോയി..

”ഇതിലെ ….പിന്നെ മസിലു പിടിച്ചു നടക്കാതെ നിങ്ങൾ പരസ്‍പരം എന്തെങ്കിലുമൊക്കെ സംസാരിച്ചു നടക്ക് , എവിടെയൊക്കെയാണ് ക്യാമെറകൾ പിടിപ്പിച്ചിരിക്കുന്നതെന്നു ഞങ്ങൾക്ക് പോലും അറിയില്ല .. ‘

ലിഫ്റ്റിൽ നിന്നിറങ്ങി നടക്കുമ്പോൾ പയ്യൻ ഞങ്ങളെ ഓർമ്മിപ്പിച്ചു ,അതോടെ പ്രിയയും സമീറയും കൂട്ടുകാരികളെ പോലെ എന്തൊക്കെയോ അടക്കം പറഞ്ഞു ചിരിച്ചു കൊണ്ട് ഞങ്ങളുടെ പിന്നിലേക്ക് മാറി നടക്കാൻ തുടങ്ങി .. രണ്ട് റൂം പിന്നിട്ടു സൈഡിലെ ഡോർ തുറന്നപ്പോൾ ഒരു ഹാളാണ് ..