🔥ഏദൻ തോട്ടത്തിന്റെ കാവൽക്കാരൻ 13🔥[സഞ്ജു സേന]

അപ്പോഴേക്കും ഫോൺ കട്ടായി ,തിരിച്ചു വിളിക്കാൻ നോക്കിയെങ്കിലും കിട്ടുന്നില്ല ,ഞങ്ങൾ അവിടെയെത്തും എന്നാണ് പറഞ്ഞത് ,അപ്പോൾ വരുന്നത് ഒറ്റയ്ക്കല്ല ..പറഞ്ഞത് പോലെ സീ ബേർഡ്സിലെ ഗുണ്ടകൾക്ക് ദീപയെ വിട്ടു കൊടുക്കാനാകുമോ ? അറിയില്ല ഏതായാലും വാസുകി ഈ സമയത്തു വിളിച്ചത് നന്നായി ,എന്തിനും അവർ കൂടിയുള്ളതു ഒരു ധൈര്യമാണ് ..

”അർജുൻ ,അയാളാണോ വിളിച്ചത് ,തീരുമാനം എന്തായി ..”

പ്രിയ ചായ ഗ്ലാസ്സുമായി അടുത്തേക്ക് വന്നു .

”ഒന്നുമറിയില്ല ,അര മണിക്കൂറിനുള്ളിൽ റയിൽവേയുടെ പാർക്കിങ്ങിൽ എത്താൻ പറഞ്ഞിട്ട് ഫോൺ വച്ചു ..”

”തിരിച്ചു വിളിച്ചു നോക്കാമായിരുന്നില്ലേ , ഇവിടെയിങ്ങനെ അധികനേരം അതും ആ പുലിയാടിച്ചിയെയും കൊണ്ട് നിൽക്കുന്നത് റിസ്‌ക്കാണ് ,”

”വിളിച്ചു നോക്കി ,ലൈൻ പോകുന്നില്ല ..”

”അർജുൻ ,ശത്രുവാണെങ്കിലും മനുഷ്യ ജീവിയാണ് ,”

”ഉം ,…പക്ഷെ ഇവളെ ഇനി വിട്ടാൽ നമ്മുടെ കാര്യം ..”

”അതും ശരിയാണ് ,ആ പെണ്ണിനെ കൂടെ കൂട്ടിയതാണ് പ്രശ്നമായത് ..”

”ഇങ്ങനെയൊന്നും പ്രതീക്ഷിച്ചല്ലല്ലോ പ്രിയ മാഡം നമ്മൾ ഓരോ കാര്യങ്ങളും ചെയ്യുന്നത് ”

”കുറ്റം പറഞ്ഞതല്ല അർജുൻ ,പക്ഷെ ….ഇവിടെ അധികനേരം നിൽക്കുന്നതും കുഴപ്പമാണ് ,രാത്രി പട്രോളിംഗ് നടത്തുന്ന പോലീസ് വണ്ടികൾ ചായ കുടിക്കാൻ സ്ഥിരമായി നിർത്തുന്ന സ്ഥലമാണ് , എങ്ങാനും അവരുടെ ശ്രദ്ധ നമ്മളിലേക്ക് തിരിഞ്ഞാൽ പണി പാളും ..”

”ഉം ,പോകാം , മാഡം ആകാശിനെയും കൂട്ടി കാറിൽ റയിൽവേ സ്റ്റേഷനിലേക്ക് നീങ്ങി കൊള്ളൂ , അവിടെത്തി സേഫായി നിന്നാൽ മതി ,പിറകെ തന്നെ ഞാനെത്തി കൊള്ളാം ,പിന്നൊരു കാര്യം ഞാനവിടെ എത്തി മെസേജ് തന്ന ശേഷമേ നിങ്ങൾ പുറത്തിറങ്ങാവു ..”

”നിങ്ങളെങ്ങനെ ? വേറെ വണ്ടിയില്ലല്ലോ ”

”ആകാശിന്റെ ബൈക്ക് ആ ഇരിക്കുന്നതാണ് ,..”

”ബൈക്ക് ഈ സമയത്തു സേഫ് അല്ല ,പ്രത്യേകിച്ച് ആ പെണ്ണിനേയും കൊണ്ട് ..”

”കാര്യമാക്കേണ്ട ,നമ്മളെ സഹായിക്കുന്ന ഒരാൾ കൂടി ഇങ്ങോട്ടു വരുന്നുണ്ട് ,അവരുടെ കാർ ഉപയോഗിക്കാം ..”

”അർജുൻ കൂടുതൽ വൈകരുത് , അറിയാലോ സംഭവം കിഡ്നാപ്പിംഗ് ആണ് ..”

”പേടിക്കേണ്ട ,ഞാൻ തൊട്ടു പിന്നിൽ തന്നെയുണ്ടാകും ,പിന്നെ ഏതെങ്കിലും രീതിയിൽ പോലീസുകാരുടെയോ ,അരുണിന്റെ ആളുകളുടെയോ കയ്യിൽ കുടുങ്ങിയാൽ എന്റെ പേര് പറഞ്ഞോളൂ ..”

പ്രിയ എന്തോ തമാശ കേട്ട മട്ടിൽ ചിരിച്ചു തള്ളി കാറിനടുത്തേക്ക് നടന്നു ..

”മാഡം ഞാൻ തമാശ പറഞ്ഞതല്ല ..”

”തമാശയാണെന്നു ഞാൻ പറഞ്ഞില്ലാലോ ..”

”പിന്നെ ചിരിച്ചത് ..”

”ചുമ്മാ …”

”നിൽക്ക് , പറഞ്ഞിട്ട് പോയാൽ മതി …”