ടോക്സിക് [സാത്യകി]

സനൂപേട്ടൻ പിന്നെയും അത് തന്നെ പറഞ്ഞു

‘സനൂപേട്ടാ.. ഞാൻ പറഞ്ഞത് ഉള്ളതാ. ഞങ്ങൾ നല്ല സത്യ ക്രിസ്ത്യാനികൾ ആണ്.. പിന്നെ എന്താ പ്രശ്നം…?

അടിച്ചതിന്റെ കിക്കിൽ അവൻ ഇവിടെ ഇരുന്നു അലക്സാണ്ടർ ചമ്പാരന്റെ കൊച്ചു മോളെ പെണ്ണ് ആലോചിക്കുകയാണ്

‘എടാ.. അത് തന്നെ ആണ് പ്രശ്നം..’

സനൂപേട്ടൻ എന്തോ അർഥം വച്ചത് പോലെ പറഞ്ഞു

‘എന്ത് പ്രശ്നം…?

ഞാൻ ഒരു ഗ്ലാസ്സ് കൂടി കമിഴ്ത്തിയിട്ട് ചോദിച്ചു

‘നിങ്ങടെ കർത്താവിനെ അല്ല അവർ വച്ചു ആരാധിക്കുന്നത്…’

സനൂപേട്ടൻ ഞങ്ങളെ രണ്ടിനെയും ഒന്ന് കുഴിഞ്ഞു നോക്കി എന്തോ സ്വകാര്യം പോലെ പറഞ്ഞു

‘അപ്പോൾ അവർക്ക് വേറെ കർത്താവ് ഉണ്ടോ…?

സുനി വെള്ളം അടിച്ച ഹാങ്ങിൽ ചോദിച്ചു.. കള്ളിനെ കുറ്റം പറയണ്ട, അല്ലേലും അവന്റെ നാവിൽ ഇത് പോലെ വെകിടത്തരങ്ങൾ ആണ് വരാറുള്ളത്

‘എടാ അങ്ങനെ അല്ല.. അവരുടെ ദൈവം വേറെയാ.. കൊള്ളില്ലാത്ത ഒരു ദൈവം ആണ് അവരുടെ..’

സനൂപേട്ടൻ പറഞ്ഞു

‘നിങ്ങൾ അങ്ങനെ പറയരുത്.. എല്ലാ ദൈവവും സത്യം ആണ്.. ദേ ഈ ഇരിക്കുന്ന ബാലുവിന്റെയും എന്റെയും ദൈവം വേറെയാണ്.. പക്ഷെ രണ്ടും ഒന്നാണ്.. സത്യമാണ്.. നിങ്ങൾ വെറുതെ വർഗീയത പറയരുത്…’

നാവ് കുഴഞ്ഞു സുനി മൊഴിഞ്ഞു

‘ എന്റെ പൊന്ന് മകനെ ഞാൻ വർഗീയത അല്ല പറഞ്ഞത്.. നമ്മൾ ഒന്നും ആരാധിക്കുന്ന ദൈവം അല്ല ഇവരുടേത്..’

സനൂപേട്ടൻ പറഞ്ഞു

‘പിന്നെ ഏത് ദൈവം..? സനൂപേട്ടൻ ഉദ്ദേശിക്കുന്നെ മറ്റേ സാത്താൻ സേവ വല്ലോം ആണോ…?

ഞാൻ ചോദിച്ചു

‘എടാ ഏത് ദൈവം എന്നൊന്നും എനിക്ക് കറക്റ്റ് അറിയില്ല.. സാത്താൻ സേവ ഒക്കെ പുറത്ത് നിന്ന് വന്നതാണെന്നാ എനിക്ക് തോന്നുന്നേ.. ഇവിടെ വന്നിട്ട് അധികം ആയിട്ടില്ലല്ലോ.. ഇത് പക്ഷെ ഇവിടെ തന്നെ ഉള്ള ഏതോ മൂർത്തി ആണ്..’