ടോക്സിക് [സാത്യകി]

‘കണക്ഷൻ നോക്കിക്കേ.. ഇവിടെ എന്തോ ഷോർട് ഉണ്ട്..’

ഞാൻ പറഞ്ഞു..

‘ആണോ..? നോക്കട്ടെ..’

ജയൻ ചേട്ടൻ കണക്ഷൻ കൊടുത്ത പയ്യനെ നോക്കി പോയി..

ഞാൻ അവിടെ നിന്ന് കുറച്ചു മാറി അങ്ങോട്ട്‌ നിന്നു. എവിടുന്നാ ഷോക്ക് അടിക്കുന്നത് എന്ന് പറയാൻ പറ്റില്ലല്ലോ..

ഞാൻ കുറച്ചു നീങ്ങി നിൽക്കുമ്പോ ആണ് നായിക താരയും അവരുടെ അസിസ്റ്റന്റും അവിടേക്ക് വരുന്നത്. ഞാൻ അവരെ അധികം ശ്രദ്ധിക്കാൻ പോയില്ല. അവർ അടുത്തെത്തിയപ്പോ ആണ് ഞാൻ തല വെട്ടിച്ചു അവരെ ഒന്നു നോക്കിയത്.. നോക്കിയപ്പോ താര വന്നു ആ ഷോക്ക് അടിക്കുന്ന കസേരയിൽ ഇരിക്കാൻ പോകുന്നു..

‘ഇരിക്കല്ലേ ഇരിക്കല്ലേ..’

ഞാൻ വിളിച്ചു പറഞ്ഞെങ്കിലും അതിനോടകം തന്നെ അവൾ അതിൽ ഇരുന്നിരുന്നു..

‘ആഹ്…’

ഞാൻ പ്രതീക്ഷിച്ചത് പോലെ തന്നെ ഷോക്ക് അടിച്ചു.. താര ചാടി എഴുന്നേറ്റ കൂട്ടത്തിൽ അവളുടെ കയ്യിൽ ഇരുന്ന ലാപ്പ് നിലത്തേക്ക് വീണു

‘മാഡം.. അതിൽ ഇരിക്കരുത്.. ഷോർട് ഉണ്ട്.. വർക്ക്‌ കംപ്ലീറ്റ് ആയിട്ടില്ല..’

ഞാൻ അവരുടെ അടുത്തേക്ക് ഓടി ചെന്നു പറഞ്ഞു

പെട്ടന്നാണ് അത് സംഭവിച്ചത്.. താരയുടെ കൈകൾ എനിക്ക് നേരെ ഉയർന്നു. ഞാൻ അത് ഒട്ടും പ്രതീക്ഷിച്ചിരുന്നില്ല. എന്റെ കരണത്തു ആദ്യമായ് ഒരു പെണ്ണിന്റെ കൈ പതിഞ്ഞു.. എനിക്ക് വിശ്വസിക്കാൻ കൂടി പറ്റിയില്ല.. ഞാൻ എന്ത് ചെയ്തു….?

‘ഇഡിയറ്റ്….’

അവൾ എന്റെ മുഖത്ത് നോക്കി ആക്രോശിച്ചു..

എന്റെ ഞരമ്പുകളിൽ കൂടി ദേഷ്യം ഇരച്ചു പൊന്തി. അവൾക്ക് ഷോക്ക് അടിച്ചതിനു എന്നെ എന്തിന് തല്ലണം.. ഞാൻ ആരുടെയും അടിമ അല്ല.. കിട്ടിയിട്ടുണ്ടെൽ അത് തിരിച്ചു കൊടുക്കും.. അതിപ്പോ ഏത് ലേഡീ സൂപ്പർസ്റ്റാർ ആയാലും..