“മതിയല്ലോ ..ഇതെന്റെ കുട്ടിയാ..ഉമ്മ്ഹ ”
മഞ്ജുസ് പുച്ഛത്തോടെ തട്ടിവിട്ടു ചെറുക്കന്റെ കവിളിൽ ചുംബിച്ചു .
“പിന്നെ…പറയുന്നത് കേട്ടാൽ നിങ്ങളുടെ മാത്രം ആണെന്ന് തോന്നൂലോ . ഇതെന്റെ ഏട്ടന്റെ കൂടി കുട്ടിയാ . എനിക്കും ഇവന്റെ മേൽ അവകാശം ഉണ്ട് ..”
അഞ്ജു അതിലേറെ പുച്ഛം വിതറികൊണ്ട് പറഞ്ഞു നിർത്തി .പിന്നെ ആദിയുടെ നേരെ കൈനീട്ടി . അഞ്ജുവുമായി ചെറുക്കൻ നല്ല കൂട്ടായതുകൊണ്ട് അവനും അനുകൂല നിലപാടെടുത്തു . പക്ഷെ മിസ് ഉണ്ടോ സമ്മതിക്കുന്നു .അവള് ചെറുക്കനെ നീക്കിപിടിച്ചു അവളുടെ മറുവശത്തായി ആദിമോനെ സോഫയിൽ ഇരുത്തി .
“തല്ക്കാലം നീ കൂടുതൽ അവകാശം ഒന്നും പറഞ്ഞു വരണ്ട …ഒന്ന് പോടീ ”
മഞ്ജുസ് അഞ്ജുവിനെ വിരട്ടികൊണ്ട് എന്നെ പാളിനോക്കി . ഞാൻ അതൊന്നും അത്ര മൈൻഡ് ചെയ്യാൻ പോയില്ല.
“ഇല്ലെങ്കിൽ ? ഇതിനെ നിങ്ങള് വരുമ്പോ കൂടെ കൊണ്ട് വന്നതൊന്നും അല്ലല്ലോ . ഇവിടെ വന്ന ശേഷം ഉണ്ടായതല്ലേ..”
അഞ്ജു ഗൗരവത്തിൽ തിരക്കിക്കൊണ്ട് പുരികങ്ങൾ ഇളക്കി .
“എന്ത് പറഞ്ഞാലും നീ തല്ക്കാലം അവനെ എടുക്കണ്ട …”
മഞ്ജുസും കട്ടായം പറഞ്ഞു .
“ദേ കണ്ണേട്ടാ..ഇത് നോക്കിയേ …ഇതിനോടൊന്നു പറഞ്ഞെ ..”
മഞ്ജുസ് അമ്പിനും വില്ലിനും അടുക്കാതായതോടെ അഞ്ജു എന്നെ നോക്കി വിളിച്ചു പറഞ്ഞു .
“പറയാൻ ഒന്നും ഇല്ല…അതിന്റെ മോന്തക്കൊന്നു കൊടുത്തിട്ട് അവനെ അങ്ങ് എടുത്തോ ..”
ഞാൻ കഴിച്ചുകൊണ്ടിരിക്കുന്നതിനിടെ തന്നെ ചിരിയോടെ പറഞ്ഞു .
“ഉവ്വ ഉവ്വ ..കൊറേ അടിക്കും ..”
എന്റെ മറുപടി കേട്ട് മഞ്ജുസ് പുച്ഛമിട്ടു .
“എടി അഞ്ജു ..ശരിക്കും ഒന്ന് കൊടുക്കെടി ..എനിക്ക് അവളുടെ കൊണ കേട്ടിട്ട് കൈ ചൊറിഞ്ഞു വരുന്നുണ്ട് ”
ഞാൻ പാതി കളിയായും പാതി കാര്യമായും പറഞ്ഞു അവരെ നോക്കി .
“ഞാൻ വേണേൽ അടിക്കും …നിന്നെപ്പോലെ പേടി ഒന്നും ഇല്ല ..”
എന്റെ ഡയലോഗ് കേട്ട് അഞ്ജുവും തട്ടിവിട്ടു .
“അതുശരി..ഒടുക്കം നമ്മക്കിട്ടു വെക്കാൻ തുടങ്ങിയല്ലേ …”
അവളുടെ മറുപടി കേട്ട് പ്ലിങ് ആയ ഞാൻ ആരോടെന്നില്ലാതെ പറഞ്ഞു .
“പിന്നല്ലാതെ …ആണുങ്ങളായാൽ കൊറച്ചൊക്കെ ധൈര്യം വേണം . കണ്ണേട്ടൻ ഒരു കോന്തൻ ആയതുകൊണ്ടാണ് ചേച്ചി കിടന്നു നെഗളിക്കുന്നത് ”
അഞ്ജു പല്ലിറുമ്മിക്കൊണ്ട് പറഞ്ഞു മഞ്ജുസിനെ നോക്കി . പിന്നെ നിലത്തൊരു ചവിട്ടും കൊടുത്തു സോഫയിലേക്കിരുന്നു ടി.വി യിലെ ചാനെൽ മാറ്റി . അവള് തമാശക്ക് പറഞ്ഞതാണേലും അത് കേട്ടപ്പോൾ എനിക്കും ഒരു വിമ്മിഷ്ടം തോന്നി .
സംഗതി അഞ്ജു പറഞ്ഞത് പോലെ എപ്പോഴും ഞാൻ മഞ്ജുസിനെ പ്രൊട്ടക്റ്റ് ചെയ്തു , കോമ്പ്രമൈസ് ആക്കി കാര്യങ്ങൾ കൊണ്ടുപോകുന്നതുകൊണ്ട് മിസ്സിന് ചെറിയ അഹങ്കാരം ഉണ്ടോ എന്ന് സംശയം ഇല്ലാതില്ല . ആകെക്കൂടി പഴയ ആക്സിഡന്റ് കേസ് എടുത്തിട്ടത് മാത്രമാണ് മഞ്ജുസിനു ശരിക്കും വിഷമം വരുന്നത് .പിന്നെ എന്നോട് മിണ്ടാതെ പിണങ്ങി നടക്കും . ഞാൻ അതൊക്കെ മനസിൽ വെച്ച് നടക്കുന്നുണ്ട് എന്നൊക്കെ പറഞ്ഞു വെറുതെ സെന്റി അടിക്കും .