ഞാൻ അയാളുടെ മുൻപിൽ എത്തിയതും റോസ്മോളുടെ സ്വരം കൂടുതൽ ഉയർന്നു . പെണ്ണിനെ ഞാൻ മഞ്ജുസിന്റെ അച്ഛന്റെ മടിയിലേക്ക് വെക്കാൻ നോക്കിയെങ്കിലും അവള് ബലം പിടിച്ചു . ഒടുക്കം എങ്ങനെയൊക്കെയോ അവളെ അവിടെ ഇരുത്തി .
ബാബർ പഠിച്ച പണി പതിനെട്ടും നോക്കിയിട്ടും അവളുടെ കരച്ചില് മാറ്റാൻ മാറ്റിയില്ല . അങ്ങേര് കത്തി എടുത്തു കയ്യിൽ പിടിച്ചാൽ ഉടനെ പെണ്ണ് നിലവിളിക്കും . പിന്നെ അച്ഛന്റെ മടിയിൽ കിടന്നു കയ്യും കാലും ഒക്കെ ഇട്ടു പെടക്കും .
ഒടുക്കം രക്ഷയില്ലെന്ന് കണ്ടതോടെ രണ്ടും കൽപ്പിച്ചു അവള് കുറച്ചു നേരം കരഞ്ഞോട്ടെ എന്ന് തന്നെ വിചാരിച്ചു പണി തുടങ്ങി . മഞ്ജുസിന്റെ അച്ഛനെ എണീപ്പിച്ചു തല്ക്കാലം ഞാൻ അവളെ മടിയിൽ ഇരുത്തി .എന്നിട്ടും വല്യ മെച്ചം ഒന്നും ഉണ്ടായില്ല . പക്ഷെ എങ്ങെനെയൊക്കെയോ ഞാനും മഞ്ജുസിന്റെ അച്ഛനും കൂടി ബലമായി പിടിച്ചു വെച്ച് സംഗതി നടത്തി എടുത്തു .
അവളുടെ തലയിൽ കത്തിവെച്ചു ചുരണ്ടിയപ്പോൾ വീണ മുടി ഒക്കെ കണ്ടു റോസിമോള് ഉറക്കെ കരയാന് തുടങ്ങി . മടിയിൽ വീണ സ്വന്തം മുടിയിഴ ഒകെ കയ്യിൽ എടുത്തുപിടിച്ചു എന്തൊക്കെയോ പിറുപിറുത്തു ഞങ്ങളെ ചീത്ത പറയുന്ന റോസിമോളെ അവിടെ കൂടിനിന്നവരൊക്കെ ചിരിയോടെയും എന്നാൽ തെല്ലൊരു സഹതാപത്തോടെയും നോക്കുന്നുണ്ട് .
“പൊന്നുസേ…ഇല്യാടി ഇപ്പോ കഴിയും …”
“ഇല്ലെടി പൊന്നോ …..”
എന്നൊക്കെ പറഞ്ഞു ഓരോ സെക്കൻഡും ഞങ്ങള് അവളെ ആശ്വസിപ്പിച്ചു . ഒടുക്കം എല്ലാം കഴിഞ്ഞു മൊട്ടത്തലയിൽ ചന്ദനം തേക്കുന്ന വരെ പെണ്ണ് ഒരേ കരച്ചിൽ ആയിരുന്നു . ഒടുക്കം അവിടെ നിന്നു അവളെയും എടുത്തു ഞാൻ എണീറ്റപ്പോൾ ആണ് അവളുടെ തേങ്ങല് അവസാനിച്ചത് . അപ്പോഴേക്കും കണ്ണിനും മൂക്കിന്നും ഒകെ വെള്ളം വന്നു വല്ലാത്ത കോലം ആയിരുന്നു .
“ചാച്ചാ …ഹ്ഹ്ഹ്…”
എന്റെ തോളിൽ കിടന്നു അവള് പിന്നെയും തേങ്ങി . മുടി പോയതിലുള്ള വിഷമം ആണോ എന്തോ . കൂട്ടത്തിൽ അവളുടേതായ ഭാഷയിൽ എന്തൊക്കെയോ പിറുപിറുക്കുന്നുണ്ട് .
“ഇവള് ജനിച്ചിട്ട് ഇന്നേവരെ ഇങ്ങനെ കരഞ്ഞിട്ടില്ല…”
പെണ്ണിന്റെ സങ്കടം കണ്ടു മഞ്ജുസ് പയ്യെ പറഞ്ഞു .
“ഹ്മ്മ്….”
ഞാൻ അതുകേട്ടു പയ്യെ മൂളി അവളുടെ പുറത്തു തട്ടി .
“പൊന്നുസേ …ഇപ്പൊ സുന്ദരി ആയെടി ….മൊട്ടകുട്ടി ആയി ”
ഞാൻ അവളുടെ തലയിൽ തഴുകികൊണ്ട് ചിരിച്ചു . പക്ഷെ അവള് സങ്കടത്തിൽ തന്നെ ആയിരുന്നു . എന്നെ മുഖം ഉയർത്തി നോക്കാൻ പോലും കൂട്ടാക്കാതെ അവളെന്റെ തോളിൽ മുഖം ചേർത്ത് തേങ്ങി .