🔥ഏദൻ തോട്ടത്തിന്റെ കാവൽക്കാരൻ 14🔥[സഞ്ജു സേന]

റഷീദ് സാർ ഒരു ഉത്തരത്തിനായി ഞങ്ങളിരുവരെയും മാറി മാറി നോക്കി .

”സർ ,ദേവമ്മ പറഞ്ഞത് പോലെ എന്തെങ്കിലും വിവരം കിട്ടുന്നത് വരെ ഒതുങ്ങി നിൽക്കുന്നതാണ് ബുദ്ധി ..അല്ലെ അർജുൻ ”

”അത് തന്നെയാണ് നല്ലതു …”

ഞാൻ അവരെ ശരി വച്ചു ..തൽക്കാലം തിരച്ചിൽ നിർത്തി എന്തെങ്കിലും സൂചന ലഭ്യമാകും വരെ സേഫായി നിൽക്കാൻ തീരുമാനിച്ചു . റഷീദ് സാർ മടങ്ങിയതോടെ പ്രിയയെ ഞാൻ പിങ്ക് പോലീസ് വാഹനത്തിനു അടുത്ത് ഡ്രോപ്പ് ചെയ്തു നേരെ കോളേജിലേക്ക് വിട്ടു ..സമയം പത്തര കഴിഞ്ഞതേയുള്ളൂ ,രാവിലെ ക്ലാസ്സുണ്ടെന്നു പറഞ്ഞാണ് പ്രിയയുടെ കാൾ വന്ന പാടെ തിരക്കിട്ടു ഇറങ്ങിയത് ,ഇനി ഈ സമയത്തു വീട്ടിലേക്ക് തിരിച്ചു കയറി ചെന്നാൽ നൂറു ചോദ്യങ്ങൾ നേരിടേണ്ടി വരും …തല്ക്കാലം കാന്റീനിൽ കയറി ചായ കുടിച്ചു ഉച്ച വരെ കോളേജിന് പരിസരത്തു ചുറ്റിക്കറങ്ങി നടക്കാം ,അതിനിടെ എന്തെങ്കിലും വിവരം കിട്ടിയാൽ പെട്ടെന്ന് നീങ്ങാനും അതാണ് നല്ലതു …

ഇടയ്ക്കൊന്നു ക്ലാസ്സിൽ കയറി സമീറയെ കണ്ടാലോ എന്ന് ചിന്തിച്ചതാണ് ,പക്ഷെ എന്നെ കണ്ടാൽ പാവം ക്ലാസ് കട്ട് ചെയ്തു ഇറങ്ങി പോരും ,വേണ്ട അവളെല്ലാം സഹിച്ചത് പഠിച്ചു ഒരു ജോലി നേടി കൂടപ്പിറപ്പുകളെ സംരക്ഷിക്കാൻ വേണ്ടിയാണു ,അതിനിടയിൽ ഞാൻ കാരണം വെറുതെ ….

ക്യാന്റീനിൽ നിന്നും ചായയൊക്കെ കുടിച്ചു ഇരിക്കുമ്പോഴാണ് സ്മിതയെ വിളിച്ചില്ലല്ലോ എന്നോർത്തത് ,ചിലപ്പോൾ ആലീസിന്റെ താവളങ്ങളെ കുറിച്ച് അവർക്ക് അറിവുണ്ടാകും ,കുറച്ചു കാലം ഒരേതൂവൽ പക്ഷികൾ ആയിരുന്നല്ലോ …വിളി കാത്തിരുന്നത് പോലെ ആദ്യത്തെ ബെല്ലിൽ തന്നെ അവർ ഫോൺ അറ്റൻഡ് ചെയ്തു ..

”ഞാൻ കരുതി എന്നെ മറന്നു പോയീന്നു ..”