🔥ഏദൻ തോട്ടത്തിന്റെ കാവൽക്കാരൻ 14🔥[സഞ്ജു സേന]

”റഷീദ് സാർ ?..”

കാത്തു നിന്ന് ക്ഷമ നശിച്ചപ്പോൾ ഞാൻ പ്രിയക്ക് നേരെ തിരിഞ്ഞു , രാവിലെ അവരുടെ കാൾ വന്നതിനു ശേഷം മനസ്സാകെ പതറി നിൽക്കുകയാണ് ,, തീയിൽ ചവിട്ടി നിൽക്കുന്നത് പോലത്തെ അവസ്ഥ . ഇത് വരെ കൃത്യതയോടെ പടുത്തുയർത്തിയ നീക്കങ്ങൾ എല്ലാം ഒറ്റ നാൾ കൊണ്ട് പൊളിഞ്ഞു അരുണിന് മുന്നിൽ അവൻ വിധിക്കുന്നതും കാത്തു നിസ്സഹായനായി നിൽക്കേണ്ടി വരുമോ ?’,,…പെട്ടെന്ന് എന്തെങ്കിലും ചെയ്തില്ലെങ്കിൽ ഞാൻ മാത്രമല്ല കുടുംബം കൂടിയാണ് . ഒരു തവണയേ കണ്ടിട്ടുള്ളുവെങ്കിലും സഹായിച്ചവളാണ് ഗായത്രി ,അവരെ രക്ഷിച്ചെടുക്കുകയും വേണം .

,
”വരും , വീട്ടിൽ നിന്നും ഇറങ്ങാൻ നേരം വിളിച്ചിരുന്നു ,,”

..

”പ്രിയാ മാഡം , ഇനി നമ്മൾ ?”

”ടെൻഷനാക്കല്ലേ അർജുൻ ,റഷീദ് സാർ എത്തിയിട്ട് നമുക്ക് തീരുമാനിക്കാം ,അതാ സാറിങ്ങെത്തി ..വാ ..,,,”

പള്ളിമുറ്റത്ത് ധ്യാനം കൂടാൻ വന്നവർക്കായി ഒരുക്കിയ പാർക്കിങ് സ്ഥലത്തേക്ക് ഒരു വെള്ളസ്വിഫ്റ്റ് കയറി വരുന്നത് ചൂണ്ടി കാണിച്ചു പ്രിയ സിമന്റ് ബെഞ്ചിൽ നിന്നുമെഴുന്നേറ്റു ..ധ്യാനം തുടങ്ങാറായിരിക്കുന്നു ,അതിന്റെ അറിയിപ്പ് മൈക്കിൽ മുഴങ്ങി തുടങ്ങിയതോടെ ആളുകൾ തിരക്കിട്ടു ഹാളിലേക്ക് കയറാൻ തുടങ്ങി ,എതിരെ വരുന്ന അവരുടെ ദേഹത്ത് തട്ടാതിരിക്കാൻ ശ്രദ്ധിച്ചു പ്രിയക്കൊപ്പം എത്താനായി ഞാൻ തിടുക്കത്തിൽ നടന്നു …

”അർജുൻ …”