Curious case edited version 1,2,3,4 [Willie Beamen]

⏩⏩⏩

“ഫസ്റ്റ് ഇയർ?” മുഖത്ത് ഒരു വളിച്ച ചിരി സെറ്റ് ചെയ്ത് ടിറ്റോ ചോദിച്ചെങ്കിലും, സിമന്റ് ബെഞ്ചിലിരുന്ന പെൺകൊച്ച് അവനെ പാടെ അവഗണിച്ചു. ടിറ്റോ വിടുമോ? “എന്താ മോളെ… ഇത്ര ജാഡയാണോ?”

“തനിക്ക് മലയാളം വായിക്കാൻ അറിയില്ലേ?” അവൾ ദേഷ്യത്തിൽ ചോദിച്ചു. വഴി ചോദിക്കാൻ കണ്ടെത്തിയ സമയം കൊള്ളാം! ഫസ്റ്റ് ഇയർ ബ്ലോക്കിന് മുന്നിലിരിക്കുന്നവളോട് തന്നെ പോയി വഴി ചോദിക്കാൻ ടിറ്റോ കാണിച്ച ആ മനസ്സ്!

“എന്താടി ഇവിടെ പ്രശ്നം?” ചുരിദാർ ഇട്ട മറ്റൊരു പെൺകുട്ടി അങ്ങോട്ട് വന്നു.

“എന്റെ പേര് ടിറ്റോ!” അവൻ സ്വയം പരിചയപ്പെടുത്തി.

“ഇതുതന്നെയാ പ്രശ്നം!” കൂട്ടുകാരിയോട് പറഞ്ഞ് അവൾ ബെഞ്ചിൽ നിന്നെഴുന്നേറ്റു. “ചേട്ടൻ ക്ലാസ്സിൽ പോകാൻ നോക്ക്,” മറ്റേ കുട്ടി പറഞ്ഞു.

“കുറച്ച് മര്യാദയൊക്കെ ആകാം,” ബെഞ്ചിലിരുന്നവളെ വിട്ട് ടിറ്റോ മറ്റവളുടെ പിന്നാലെ കൂടി.

“എടോ… തന്നോട് പോകാനല്ലേ പറഞ്ഞത്!” അവൾ ശബ്ദം ഉയർത്തി.

“എന്താ അനിയാ പ്രശ്നം?” അഞ്ചടി ഏഴിഞ്ച് പൊക്കത്തിൽ അങ്ങോട്ട് വന്നത് ഇഷാനാണ്. ടിറ്റോ ശല്യം ചെയ്ത ആ ബെഞ്ചിലിരുന്ന കുട്ടി ബബിതയുടെ സ്വന്തം ചേട്ടൻ! ഇഷാൻ വന്നപ്പോൾ തന്നെ കൂട്ടുകാരി ശരണ്യയെയും വലിച്ചുകൊണ്ട് ബബിത അവിടുന്ന് മുങ്ങി. ശരണ്യ ഇഷാന്റെ കൂട്ടുകാരൻ സന്ദീപിന്റെ അനിയത്തിയാണ്.

“ഇവിടെ ഒരു പ്രശ്നവുമില്ല ചേട്ടാ, പോകാമല്ലോ,” ഇഷാനെ ഒഴിവാക്കി തിരിഞ്ഞു നോക്കിയ ടിറ്റോ കണ്ടത് അവിടുന്ന് ഓടിപ്പോകുന്ന പെൺകുട്ടികളെയാണ്.